डडेल्धुरा । नेपाली कांग्रेसका निवर्तमान सभापति शेरबहादुर देउवा पक्षले समानान्तर महाधिवेशनको तयारीलाई तीव्र बनाउँदै सुदूरपश्चिमका आठ जिल्लामा संयोजक तोकेको छ।
देउवा पक्षले डडेल्धुरामा डिल्लीराज जोशीलाई जिल्ला संयोजकको जिम्मेवारी दिएको छ। पूर्वमहामन्त्री डा. शशांक कोइरालाको संयोजकत्वमा गठित महाधिवेशन आयोजक समितिले जिल्ला संयोजकहरू तोकेको हो।
नेता एनपी साउदका अनुसार सुदूरपश्चिमका आठ जिल्लामा तोकिएका संयोजकहरूमा बाजुरामा धनराज पण्डित, बझाङमा हर्कजंगबहादुर सिंह, डोटीमा नरेन्द्रबहादुर सिंह, दार्चुलामा सुरेन्द्र अवस्थी, बैतडीमा वीरबहादुर विष्ट, डडेल्धुरामा डिल्लीराज जोशी, कञ्चनपुरमा पदम बोगटी र कैलालीमा खेमबहादुर डगौरा थारू रहेका छन्।
यस्तै कैलालीमा राम समझ रानालाई सहसंयोजक तोकिएको छ।
कञ्चनपुरका संयोजक पदम बोगटी यसअघि नै जिल्ला सभापति थिए। उनी अहिले संस्थापन पक्षको विरोधी कित्तामा उभिएका छन्।
देउवा पक्षले असोज १५ गते वडा अधिवेशन र मंसिर २१ देखि २३ गतेसम्म महाधिवेशन गर्ने कार्यतालिका सार्वजनिक गरेको छ। सोहीअनुसार जिल्ला संयोजकहरूले सम्बन्धित जिल्लामा अधिवेशनका लागि आवश्यक संगठनात्मक तयारी तथा समन्वय गर्ने बताइएको छ।
