काठमाडौं। आईसीसी टी–२० विश्वकप एसिया तथा इस्ट एसिया प्यासिफिक छनोटमा एक मात्रै अपराजित टोली नेपाल सुपर सिक्स चरणमा उत्कृष्ट प्रदर्शन गर्दै शीर्ष स्थानमा छ।
सुपर सिक्समा नेपालले अहिलेसम्म खेलेका चारै खेल जित्दै अपराजित यात्रा कायम राख्न सफल भएको हो। दुई खेलअगाबै अर्को वर्ष भारत र श्रीलंकामा आयोजना हुने विश्वकपमा स्थान सुरक्षित गरिसकेको नेपालले शुक्रबार अन्तिम खेलमा समोआलाई चुनौती पेस गर्ने भएको छ। खेल अल अमेरात क्रिकेट मैदान ओमान क्रिकेटमा अपराह्र ४ः१५ बजे सुरु हुनेछ।
अब नेपाललाई सुपर सिक्सको अन्तिम खेल जित्दै च्याम्पियन बन्ने उत्कृष्ट अवसर मिलेको छ। सामोआविरुद्धको खेल जिते नेपाल अपराजित रूपमा समूह विजेता बन्दै प्रतियोगिताको च्याम्पियन बन्नेछ। समूह चरणमै जापानलाई पराजित गर्दै सुपर सिक्समा दुई अंक लिएर आएको नेपालले संयुक्त अरब इमिरेट्स (यूएई),ओमान र कतारलाई पराजित गर्दै ८ अंकसहित तालिकाको शीर्ष स्थान कब्जा गरेको हो।
दोस्रो स्थानमा यूएई र तेस्रो स्थानमा रहेको ओमानको क्रमशः ६–६ अंक छ। यी दुई टोलीले पनि नेपालसँगै विश्वकपमा आफ्नो स्थान सुरक्षित गरिसकेका छन्। ओमानको खेल सकिँदा यूएईले भने शुक्रबार नै प्रतियोगिताबाट बाहिरिइसकेको जापानसँग खेल्नेछ। जित्यो भने उसको पनि ८ अंक नै हुनेछ। त्यसैलाई नेपाललाई जितको विकल्प हुनेछैन। यद्यपि, समोआ प्रतियोगिताकै कमजोर टोली हो। हालसम्म जित निकाल्न नसकेको यो टोली सुपर सिक्सको अन्तिम स्थानमा छ।
