काठमाडौं– शीर्षस्थानको स्कटल्यान्डलाई ६ विकेटले स्तब्ध बनाउँदै नेपाल आइसीसी विश्व कप लिग २ को अंक तालिकाको पाँचौं स्थानमा उक्लिएको छ। साथै नेपालले पहिलो खेलमा भोगेको हारको बदला लिन पनि नेपाल सफल रह्यो।
आजको जितमा स्टार लेग स्पिनर सन्दीप लामिछानेको विश्व कीर्तिमान, रोहित पौडेल र इशान पाण्डेको सतकीय साझेदारीसँगै दुवैको अर्धशतक प्रमुख रह्यो।
जितको लागि १ सय ९५ रनको लक्ष्य ३८.१ ओभरमा ४ विकेटको नोक्सानीमा पूरा गर्यो। ओपनरद्वय कुशल भुर्तेल र आशिफ शेखले ५८ रनको साझेदारी गर्दै सन्तोषजनक सुरुवात दिलाए। आशिफ २९ रन जोडेर रन आउट भए लगत्तै कुशल पनि २८ रनमा पबिलियन फर्किए।
यसपछि इशान र रोहितले ७.२ ओभर देखि २९.५ ओभरसम्म तेस्रो विकेटको लागि १ सय ४ रनको शतकीय साझेदारी गर्दै नेपालको जितलाई सहज बनाए।
वान डाउनमा क्रिजमा छिरेका इशानले सामना गरेको ५३ औं बलमा मार्क वाटलाई नो बलमा छक्का प्रहार गर्दै अर्धशतक बनाए। उनले ५३ बलमा ५ चौका र २ छक्का प्रहार गरे। उनको यो करियरको पहिलो ओडिआई अर्धशतक हो। उनी ५५ रनमा आउट भए।
रोहितले पनि अर्धशतक बनाए। ७६ बलमा २ चौका र १ छक्का सहित १२ औं ओडिआई अर्धशतकको सफलता प्राप्त गरे। उपकप्तान दीपेन्द्र भने २ रनमा आउट भए।
४ विकेटको क्षतिमा नेपालले १ सय ६७ रन बनाउँदा जितको लागि २८ रन मात्र आवश्यक थियो। जितको लागि २ रन जरुरी हुँदा मापकल लिस्कको बलमा छक्का प्रहार गर्दै नेपाललाई जित दिलाए। ९८ बल खेल्दै रोहित अविजित ७४ रनमा रहे। आरिफ शेख अविजित ८ रनमा रहे।
बलिङमा स्कटल्यान्डका खेलाडीहरूको प्रदर्शन फितलो रह्यो। मार्क वाटले १० ओभरमा १ मेडन सहित ५८ रन दिएर २ विकेट लिए। ब्रान्डन मकमलेनले १ विकेट झारे।
त्यसअघि टस जितेर पहिले ब्याटिङ गरेको स्कटल्याण्डले ३९.१ओभर ओभरमा सबै विकेट गुमाएर १ सय ९४ रनमा समेटियो।
स्कटल्याण्डका ओपनर फिन्ले म्याक क्रेथ ६ रनमा दीपेन्द्रको बलमा एलबिडब्लु आउट भए। पहिलो विकेटको नोक्सानीमा १८ रन बनाएको थियो। यसपछि जर्ज मुन्सी र ब्रान्डन मकमलेनले दोस्रो विकेटको लागि ५३ रनको साझेदारी गरे।
मुन्से २१ रनमा सन्दीपको बलमा आउट भए। तेस्रो विकेटको रूपमा कप्तान रीची बेरिङ्गटन १२ बलमा ललित नारायण राजवंशीको बलमा आउट भए। उनले तीन खेलपछि लिएको यो पहिलो विकेट हो।
यसपछि क्रिजमा जमेका मकमलेनलाई सन्दीपले इशान पाण्डेद्वारा क्याच आउट गराउँदै विश्व रेकर्ड कायम गरे। उनी विश्व एक दिवसीय क्रिकेटमा सर्वाधिक छिटो १ सय ५० विकेट लिने खेलाडी बने।
उनले अष्ट्रेलियन मिचेल स्टार्सको नाममा रहेको रेकर्ड तोडेका हुन्। मिचेलले सन् २०१९ को विश्व कपमा वेस्ट इन्डिज विरुद्धको खेलमा ७७ खेलमा १ सय ५० विकेटको कीर्तिमान बनाएका थिए। सन्दीपले ७३ खेल खेल्दै ७१ इनिङ्समा १ सय ५० विकेट लिंदै स्टार्सको रेकर्ड तोडे।
मकमलेनले ४४ बल खेल्दै ६ चौका र ६ छक्का प्रहार गर्दै टिमको लागि सर्वाधिक ७३ रन जोडे। लगतै म्याथ्यु क्रस १ रनमा आउट भए। र मार्क वाट २० रनमा आउट भए। ६ विकेट गुमाउँदा स्कटल्यान्डले १ सय ७५ रन बानएको थियो।
यसपछि १ रन बनाएका माइकल लिस्क, रनको खाता नखोलेका ओलिभर डेबिडसन २ रन बनाएका ओलि जोन्स तीनै खेलाडी ललितको बलमा आउट भए। माइकल लिस्क भने क्रिजमा टिके। उनले ६९ बलमा ४ चौका र १ छक्का सहित अर्धशतक बनाए।
बलिङमा ललितले उत्कृष्ट कमब्याक गरे। उनले ८ ओभरमा ३२ रन दिएर ४ विकेट लिए। सन्दीपले १० ओभरमा ४७ बल दिंदै ३ विकेट लिए।
लिग २ मा स्कटल्यान्डको यो नवौं हार हो। ३८ अंक सहित शीर्षस्थानमा रहँदा नेपाल २२ अंक सहित पाँचौं स्थानमा उक्लियो। नेपाल र नामिबियाको समान २२ अंक भएपनि नेपाल रन रेटको आधारमा अगाडि छ।
बुधबार स्कटल्यान्ड र अमेरिकाबीच खेल हुनेछ। सिरिजको अन्तिम खेल शुक्रबार नेपाल र अमेरिकाबीच हुनेछ। हाम्रो खेलकुदबाट ..
