काठमाडौँ । नेपाल प्रिमियर लिग (एनपीएल) को तेस्रो संस्करणका लागि सुदूरपश्चिम रोयल्सले डडेल्धुराका युवा क्रिकेटर टेकराज थलाललाई ‘आइकोनिक’ खेलाडीका रूपमा छनोट गरेको छ। सुदूरपश्चिमका विभिन्न जिल्लामा सञ्चालन गरिएको प्रतिभा खोज कार्यक्रम (ट्यालेन्ट हन्ट) बाट थलाल छनोट भएका हुन्।
बायाँहाते मध्यम गतिका बलर थलाल यसअघि सुदूरपश्चिम रोयल्सको डेभलपमेन्ट स्क्वाडमा रहेर खेलिसकेका छन्। यसपटक भने टोलीले उनलाई एनपीएलका लागि आइकोनिक खेलाडीका रूपमा अवसर दिएको हो।
स्थानीय क्रिकेट प्रतिभाको पहिचान र विकास गर्ने उद्देश्यले सुदूरपश्चिम रोयल्सले प्रदेशका नौवटै जिल्लामा ट्यालेन्ट हन्ट सञ्चालन गरेको थियो। असोज १४ गते बैतडीको दिलासैनीबाट सुरु भएको छनोट अभियान बझाङ, डोटी, डडेल्धुरा, अछाम, बाजुरा, कैलाली र कञ्चनपुरसम्म पुगेको थियो। कार्यक्रमको अन्तिम चरण असोज २० र २१ गते धनगढी ओभलमा सञ्चालन गरिएको थियो।
यसैगरी, ट्यालेन्ट हन्टबाट अन्य छ जना खेलाडी पनि छनोट भएका छन्। कञ्चनपुरका धीरेन्द्र साउद र लोकेश जोशी, कैलालीका हेमन्त बुढा, सन्तोष विश्वकर्मा र सुधांशु रावल तथा दार्चुलाका वीरेन्द्र बमलाई ‘हिरोज’का रूपमा छनोट गरिएको छ।
छनोट भएका यी छ खेलाडीले सुदूरपश्चिम रोयल्सको डेभलपमेन्ट स्क्वाडमा स्थान बनाएका छन्। ट्यालेन्ट हन्टमार्फत स्थानीय खेलाडीलाई अवसर दिँदै टोलीले सुदूरपश्चिमको क्रिकेट प्रतिभालाई अघि बढाउने प्रयास गरेको छ।
