डडेल्धुरा । सरकारी विद्यालयमा कार्यरत शिक्षक दमन महतामाथि कारबाहीका लागि राष्ट्रिय स्वतन्त्र पार्टी परशुराम नगर कमिटीले जिल्ला कमिटी डडेल्धुरालाई सिफारिस गरेको छ।
रास्वपाको सदस्यसमेत रहेका महतालाई शिक्षक पदमा रहेर पार्टीको राजनीतिमा सक्रिय भएको विषयमा प्रश्न उठेपछि दुईमध्ये एउटा जिम्मेवारी छाड्न सिफारिस गरिएको हो।
रास्वपाका एक नेताका अनुसार नगर कमिटीले महतालाई शिक्षक पदबाट राजीनामा दिएर राजनीतिमा आउन वा पार्टीको सदस्यताबाट राजीनामा दिन सिफारिस गरेको छ।
ती नेताले महताले अनलाइनमार्फत रास्वपाको सदस्यता लिएको बताए। समाचार तथा सामाजिक सञ्जालमा सरकारी शिक्षक भएर पार्टीको सदस्यता लिएको र राजनीतिक कार्यक्रममा सहभागी भएको विषयमा प्रश्न उठेपछि पार्टीले कारबाहीका लागि सिफारिस गरेको उनको भनाइ छ।
‘शिक्षक दमन महताले अनलाइनबाट हाम्रो पार्टीको सदस्यता लिएका रहेछन्। समाचार तथा सामाजिक सञ्जालमा उनको पार्टी सदस्यताबारे प्रश्न उठेपछि कारबाहीका लागि सिफारिस गरिएको हो,’ ती नेताले भने।
उनका अनुसार महताले मौखिक रूपमा राजीनामा दिएर आगामी निर्वाचनका लागि पार्टीको ‘क्यान्डिडेट क्लब’मा आउने बताएको जानकारीसमेत दिएका छन्। यद्यपि, उनले औपचारिक रूपमा कुन पदबाट राजीनामा दिने भन्ने विषयमा निर्णय गरिसकेका छन् वा छैनन् भन्ने स्पष्ट भइसकेको छैन।
यसअघि सुदूरलाइभले रास्वपा परशुराम नगर कमिटीको बैठकमा शिक्षक महताले राजनीतिक मन्तव्य राखेको अडियोसहितको समाचार प्रकाशित गरेको थियो। उक्त समाचारमा महता सरकारी विद्यालयमा कार्यरत रहँदै पार्टीको कार्यक्रममा सहभागी भएर भाषण गरेको विषय उठाइएको थियो।
समाचार प्रकाशित भएपछि शिक्षकको राजनीतिक आबद्धता र सरकारी सेवामा रहँदा दलगत राजनीतिमा सक्रिय हुन मिल्ने वा नमिल्ने विषयमा थप बहस सुरु भएको थियो। त्यसपछि रास्वपा परशुराम नगर कमिटीले महतामाथि कारबाहीका लागि जिल्ला कमिटीसमक्ष सिफारिस गरेको हो।
अब जिल्ला कमिटी डडेल्धुराले यस विषयमा के निर्णय गर्छ भन्ने चासो बढेको छ।
