डडेल्धुरा । गन्यापधुरा गाउँपालिकाले तीन सभाहल र ३६ कोठा भएको आधुनिक प्रशासकीय भवनबाट सेवा प्रवाह गर्ने भएको छ। गाउँपालिका–२ गणेशपुरमा निर्माण गरिएको उक्त भवनको आइतबार गाउँपालिका अध्यक्ष इन्द्रबहादुर कार्कीले उद्घाटन गरेका हुन्।
६ करोड ५३ लाख रुपैयाँभन्दा बढी लागतमा निर्माण गरिएको भवनको अध्यक्ष कार्कीले रिबन काट्नुका साथै शिलालेख अनावरण गरेर उद्घाटन गरेका थिए। उद्घाटन समारोहमा धार्मिक विधिअनुसार पूजाआजा समेत गरिएको गाउँपालिका–२ का वडाध्यक्ष मनोज देउवाले जानकारी दिए।
यसअघि भाडाको घरबाट प्रशासनिक सेवा सञ्चालन गर्दै आएको गाउँपालिकाले पछिल्लो समय कृषि तथा पशु सेवा एकीकृत भवनबाट सेवा दिँदै आएको थियो। नयाँ प्रशासकीय भवन सञ्चालनमा आएपछि सेवाग्राहीलाई सेवा लिन सहज हुने र कार्यालयको कामकाज थप व्यवस्थित बन्ने गाउँपालिका अध्यक्ष कार्कीले बताए।
अध्यक्ष कार्कीका अनुसार गाउँपालिकाले शिक्षा, स्वास्थ्य, खेलकुद, सडक, सिँचाइ, खानेपानी तथा कृषि पूर्वाधार विकासलाई प्राथमिकतामा राखेर काम गरिरहेको छ। पाँच वडा रहेको गाउँपालिकामध्ये चार वडामा आफ्नै वडा कार्यालय भवन निर्माण भइसकेका छन्। गाउँपालिकामा एमबीबीएस चिकित्सकसहितको १० शय्याको आधारभूत अस्पताल र दुई वटा शीतभण्डारसमेत सञ्चालनमा रहेका छन्।
गाउँपालिकाका प्रमुख प्रशासकीय अधिकृत लिलिप तामाङका अनुसार प्रशासकीय भवन निर्माणका लागि २०७८ पुस २२ गते ठेक्का सम्झौता गरिएको थियो। २०८१ पुस २० गतेसम्म निर्माण सम्पन्न गर्ने लक्ष्य राखिए पनि सङ्घीय सरकारबाट साझेदारीबापतको रकम समयमै उपलब्ध नहुँदा निर्माणमा करिब दुई वर्ष ढिलाइ भएको हो।
भवन निर्माणका लागि ६ करोड ५२ लाख रुपैयाँमा ठेक्का सम्झौता भएको थियो। गाउँपालिकाको स्वामित्वमा रहेको ११ रोपनी जग्गामध्ये आठ रोपनी क्षेत्रफलमा भवन निर्माण गरिएको प्रमुख प्रशासकीय अधिकृत तामाङले बताए।
