भाद्र १४, डडेल्धुरा । रसुवामा आएको बाढीपछि सम्पर्कविहीन रहेका डडेल्धुराका ६ जना सम्पर्कमा आएका छन् भने १७ जना अझै सम्पर्कविहीन रहेका छन्।
जिल्ला प्रशासन कार्यालयबाट प्राप्त विवरणअनुसार सम्पर्कमा आएका ६ जनामा लाङटाङ हाइड्रोमा काम गर्ने आलिताल-३ का सुनिल बुढामगर, भाडाकुडाको व्यपार गर्ने अमरगढी-६ का विजय ताम्राकार, वर्षा ताम्राकार, विपेश ताम्राकार, प्रहरी चौकी रसुवागढीमा कर्यरत पशुराम नगरपालिका-४ का प्रहरी जवान नारद सार्की र प्रहरी जवान घनश्याम कामी रहेका छन्। विजय ताम्राकार, वर्षा ताम्राकार र विपेश ताम्राकारलाई उद्धार गरी काठमाडौंको बौद्ध चोकमा राखिएको विवरणमा उल्लेख छ। विजय ताम्राकारको टाउको र बायाँ हातमा सामान्य चोट लागेको जनाइएको छ।
यस्तै, हाइड्रोमा कार्यरत सुनिल बुढामगर, रसुवागढी प्रहरीमा कार्यरत प्रहरी जवान नारद सार्की र घनश्याम कामी पनि सम्पर्कमा आएका हुन्।
यसैबीच, रसुवा बाढीपछि डडेल्धुराका १७ जना अझै सम्पर्कविहीन रहेको जिल्ला प्रशासन कार्यालय डडेल्धुराका प्रमुख जिल्ला अधिकारी अमर बहादुर ओलीले बताउनु भयो।प्रजिअ ओलिका अनुसार सम्पर्कविहीन हुनेमा आलितालका उमेश बुढामगर, गौरव रामजाली मगर, सुन्दर बुढामगर, गोविन्द रामजाली, दिनेश भन्ने उत्तम रामजाली, लक्ष्मण रामजाली, नरेन्द्र भन्ने नवीन साउद, दिपेन्द्र भन्ने दिपक घर्ती मगर, राजेश घर्ती मगर, किरण घर्ती मगर, चन्द्रबहादुर जर्घा मगर, नवदुर्गाका प्रशान्त ऐर, अमरगढिका शेरबहादुर शाहु, गन्यापधुराका हिक्मत पाल, सुरजबहादुर महता, रमेश जोशी र रसुवामा पसल गरी बसेका अमरगढीका इन्द्रबहादुर थापामगर रहेका छन्।
उनीहरूको खोजी तथा अवस्थाबारे थप विवरण लिने क्रम जारी रहेको जिल्ला प्रशासन कार्यालय डडेल्धुराले जनाएको छ।
