काठमाडौँ । काठमाडौँ महानगरपालिका–१० शङ्खमुलस्थित एक होस्टलमा भएको कुटपिट तथा धारिलो हतियार प्रहारबाट २२ वर्षीय युवकको मृत्यु भएको छ। घटनामा संलग्न भएको आरोपमा प्रहरीले एक किशोरसहित अन्य पाँच जनालाई नियन्त्रणमा लिएको छ।
प्रहरीका अनुसार दाङको घोराही उपमहानगरपालिका–१७ घर भएका २२ वर्षीय वसन्त कालाथोकीलाई शुक्रबार बिहान शङ्खमुलस्थित भ्याली ब्वाइज होस्टलमै १८ वर्षीय किशोर र २० वर्षीय प्रमित पटेलले कुटपिट गर्नुका साथै धारिलो हतियार प्रहार गरेका थिए।
गम्भीर घाइते भएका कालाथोकीलाई उपचारका लागि मीनभवनस्थित निजामती कर्मचारी अस्पताल लगिएको थियो। उपचारकै क्रममा उनको मृत्यु भएको प्रहरीले जनाएको छ।
घटनालगत्तै प्रहरी वृत्त नयाँ बानेश्वरबाट खटिएको टोलीले बाराको कलैया उपमहानगरपालिका–३ घर भएका १८ वर्षीय किशोरलाई पक्राउ गरेको छ। घटनामा संलग्न रहेको आरोपमा अन्य पाँच जनालाई समेत प्रहरीले नियन्त्रणमा लिएर अनुसन्धान गरिरहेको छ।
घटनामा संलग्न भएको आरोप लागेका २० वर्षीय प्रमित पटेल भने फरार रहेका छन्। उनको खोजी कार्य तीव्र पारिएको प्रहरीले जनाएको छ।
यसैबीच, छोराको मृत्युको खबर पाएपछि मृतक कालाथोकीकी आमाले समेत आत्महत्या गरेको बताइएको छ। आमाले आत्महत्या गर्नुको कारणबारे पनि प्रहरीले अनुसन्धान गरिरहेको जनाएको छ।
घटनाबारे थप अनुसन्धान भइरहेको प्रहरीले जनाएको छ।
