सिराहामा फेरि तनाव: मृतक बालकको घरअगाडि स्थानीय र सुरक्षा निकाय आमनेसामने

गृहमन्त्री सुदन गुरुङ मृतक परिवारलाई भेट्न पुग्ने तयारी भइरहेका बेला नेपाल प्रहरी, सशस्त्र प्रहरी र जिल्ला प्रशासन कार्यालयको टोली त्यहाँ पुगेको थियो। त्यसक्रममा स्थानीयले सुरक्षाकर्मीका सवारीसाधन घेराउ गर्दै विरोध जनाएका छन्।

प्रदर्शनमा सहभागी स्थानीयले आन्दोलनका क्रममा पक्राउ परेका व्यक्तिहरूलाई तत्काल रिहा गर्न माग गरेका छन्। उनीहरूलाई साम्प्रदायिक सद्भाव बिथोल्ने आरोपमा नियन्त्रणमा लिइएको भन्दै स्थानीयले त्यसको विरोध गरेका हुन्।

बिहीबार सुनसरी घटनाको विरोधमा गोलबजारमा भएको प्रदर्शनका क्रममा औरही गाउँपालिका–२ तुलसियाहीका १५ वर्षीय गणेश यादवलाई गोली लागेको थियो। उपचारका क्रममा उनको मृत्यु भएपछि घटनाले थप संवेदनशील रूप लिएको छ।

क्षेत्रमा सुरक्षा व्यवस्था कडा पारिएको छ भने अवस्था नियन्त्रणमा राख्न सुरक्षाकर्मी परिचालन गरिएको छ। स्थानीयले घटनाको निष्पक्ष छानबिन, दोषीमाथि कारबाही र पक्राउ परेकाहरूको रिहाइको माग दोहोर्याइरहेका छन्।